dimecres, 4 de maig del 2011

MUYER




Muyer, el galán y amable caballeru que quieres
y el dragón que tarreces de pensamientu torturáu
ye un monstruu bicéfalu capaz de tienros afalagos,
y capaz, tamién, d’una violencia repentina y cruel.

Muyer, el to llar ye una cueva con hipoteca,
un xoril llóbregu y amargu de llunes eclipsaes
onde tas atada a una cadena d’esllabones invisibles,
difícil d’arrastrar, imposible de romper.

Muyer, l’amor y l’odiu, el desencantu y el mieu
forniquen, y apíquente la cabeza de lloques caparines
mientres l’agriada borra del querer enllena
coles charques del rancor el suelu per au pases.

Muyer, el paraísu ye la fuxida suañada, inalcanzable,
el purgatoriu’l cuartu onde mastigues la pena,
el llimbu’l sucu húmedu onde ye muerta l’allegría,
y l’infiernu’l moráu infrinxíu na epidermis.


Torna pal asturianu de Josep Carles Laínez (http://aunquetalvez.blogspot.com)